Megrunarkúrar þjóna litlum tilgangi fyrir meirihluta fólks að sögn vísindamanna

Þessu hef ég alltaf haldið fram, þarf enga vísindamenn til að segja mér þetta, þekki þetta af eigin reynslu, enda sýnir reynslan mér það bara.    En auðvitað fellur maður alltaf í þennan forarpitt að skella sér í megrun endrum og eins, alltaf með sama árangri.  Ágætt að fá þetta staðfest svona á prenti - ekki ætlar maður að auka hættuna á hjartaáföllum og heilablóðföllum með að fara í megrun meir, nóg er áhættan fyrir.  hehehe

Held reyndar að ég reyni að taka mér súkkulaðipásu á næstunni, búin að gúffa í mig alveg ógrynni af súkkulaði yfir hátíðarirnar. 

Megrunarkúrar þjóna litlum tilgangi fyrir meirihluta fólks að sögn vísindamanna

Gleðilega páska - málshættir fjölskyldunnar

  Jæja, allir búnir að finna páskaeggin sín í morgun og fólk á góðri leið með að fá í magann af súkkulaði óverdósi 

Málshættir fjölskyldunnar að þessu sinni urðu:

 

Rósa:  Sannleikanum verður hver sárreiðastur

Jón Fannar:  Sætur er ábata þefurinn

Eliza Lív:  Að hika er sama og tapa

Anita Ýrr:  Lengi getur fullur etið og latur legið

 

Það er nú ekki hægt að segja annað en að páskaeggin í ár hafa hitt beint í mark...hehehe

Stjörnuspá dagsins

Rakst fyrir tilviljun á stjörnuspánna mína inná MBL.is núna áðan, fannst hún viðeigandi í dag, hehe...

  Vatnsberi: Fólk er yfir sig hrifið af þér, og þú ættir að reyna að njóta þess - jafnvel fá eitthvað út úr því! Vinir þínir elska að fá að kynnast þér með því að skoða myndir eða hitta fjölskyldina þína.

-ég þarf greinilega að líta betur í kringum mig og finna allt þetta hrifna fólk!

Bloggpása...

...eins og glöggir lesendur hafa eflaust tekið eftir að þá hefur ekki mikið verið bloggað hér á bæ að undanförnu.  Fólkið er einfaldlega búið að vera upptekið við aðra hluti í frítímum sínum.  Við fundum loksins húsgögn sem að okkur leist vel á og fjárfestum við okkur í svoleiðis um daginn.  Eins er búið að vera að dytta að ýmsu smálegu í húsinu, vinna, sofa, fara í heimsóknir og fleira smálegt þannig að tölvan er eiginlega bara búin að vera vanrækt.  Svo er ég líka búin að vera upptekin við að prjóna síðustu vikur - svo að þau 30.8% ykkar sem að svöruðu því í könnuninni að ég myndi taka fram prjónana, hafið haft rétt fyrir ykkur. 

Gerðum okkur dagamun síðastliðinn miðvikudag, borðuðum á Reykjavík Pizza Company, namm namm, voða góðar eldbakaðar pizzur þar, mæli alveg með því.  Síðan skelltum við okkur yfir í Möguleikhúsið við Hlemm, þar sem við sáum Epli og Eikur, með Hugleik.  Alveg þrusugóð sýning og gaman að henni.  Á eftir buðu Nína og Keith okkur heim til sín í rauðvín og osta og dvaldist okkur þar dágóða stund.  Röltum síðan upp á hótel í rólegheitum, fyrst að maður var að gera sér dagamun, þá um að gera að gera það með stæl!

Erum búin að fara í 3 fermingarveislur að undanförnu og auðvitað var borðað á sig gat í þeim öllum.  Í gær fengum við okkur langan* bíltúr í tilefni dagsins, á Flúðir, græddum bæði kaffi og með því og svo grillveislu um kvöldið áður en brunað var heim aftur.  Það má segja að öll plön um kílóafækkun séu á hillunni þessa dagana.  Á von á því að þurfa að leggjast undir skurðarhnífinn einhverntímann á næstu vikum til að láta laga gamalt/nýtt mein og þá í kjölfarið, vonandi, minnkar eitthvað spekið......hehehe

Komment dagsins í gær átti ég sjálf þegar við vorum á rúntinum.  Búin að keyra í gegnum bæinn og Mosó og vorum komin á Þingvöll, og þar var líka flaggað í hálfa stöng eins og svo víða, svo að uppúr mér kemur; hver ætli hafi eiginlega dáið, það er barasta alls staðar flaggað í hálfa, meira að segja á Þingvöllum.*  hahaha   

*(ég vil taka það fram fyrir þá sem að ekki fatta, það var föstudagurinn langi!)

Pestarbæli...

Heldur bálegt ástandið á heimilinu núna, stelpurnar báðar lagastar í flensu og húsmóðirin ekki alveg heil heilsu heldur.  Samt ekki alveg eins veik og þær.  Ég hef barasta aldrei vitað eins harðgera flensu, Eliza er búin að liggja síðan á laugardaginn, með háan hita, en Anita lagðist í gær.  Alveg merkilegt hvað hitalækkandi hefur lítil áhrif á Anitu.  Hún fer alveg uppí 40 stiga hita, fær hitalækkandi, og þá eftir 1-2 tíma að þá er hitinn kannski kominn niður í 39.3, þó að hún sé bara á nærfötum.  Ég hef aldrei kynnst þrautsegjari hita eða jafn langri flensu.  Þær vöknuðu báðar með 39 stiga hita í morgun svo að þetta er greinilega ekkert á undanhaldi.  Einnig fylgir þessu  barkabólga, hæsi og hósti.  Svo að ég mæli ekkert með að fólk sé að koma í heimsókn á meðan þessi ósköp dynja yfir, nema náttúrulega að það vilji ná sér í flensu!!   Vonandi verður þessu nú lokið um helgina samt, ekki gaman af þessu veikindastússi!!

Draumfarir

Við vorum bara að vakna, en ég get ekki annað en sest niður og skrifað niður þennan draum sem að mig dreymdi í nótt, hann er svo rosalega sterkur.

 Ég er á gangi niður aðalgötu bæjarins ásamt vinkonu minni.  Við erum staddar ca. við hliðiná gamla pósthúsinu, áður en við komum að Paddy's.  Þá sjáum við flugvél vera að hrapa, neðar í götunni, hún stefndi ca. þvert niður, var hvít og blá með Icelandair logoinu á stélinu og svo kom bara hvellur og svona eldhaf sem að barst upp götuna í áttina á okkur.  Við náðum að forða okkur á bak við næsta bíl á meðan eldhafið fór framhjá, en þvílíkur hiti.  Ég reyndi að hringja í 112 en það var alltaf á tali.  Þegar hitann lægði ákvaðum við að fara nær, en þá var vinkona mín allt í einu orðin önnur vinkona mín og sú átti heima neðar í götunni, og í húsinu hennar voru börnin hennar sofandi.  Við hlupum niðureftir og sáum þá hvar flugvélin stóð beint uppúr einum elsta skemmtistað bæjarins, stélið upp, en núna var þetta ekki Icelandair, heldur logo frá öðru flugfélagi sem að ég man ekki hvað heitir, samt svona gyllt á lit.  Húsið hennar var við hliðina skemmtistaðnum, en allir heilir á húfi þar inni.  Ég kvaddi hana, og sagðist ætla að kíkja á systur mína, en systir mín var samt aldrei nafngreind í draumnum.  Allt í einu er ég stödd á bakvið skemmtistaðinn þar sem að flugvélin stendur uppúr húsinu og allt brunnið í kringum hana.  Þá tek ég eftir að það er fullt af fólki í sjónum, en það er samt allt lifandi og á leið til lands.   Það var samt mjög djúpt í vatninu, uppað höndum og haus.  Ég þekkti ekki þetta fólk, þetta voru farþegar úr flugvélinni.

Samkvæmt www.draumur.is táknar það að dreyma flugslys eftirfarandi:

Flugslys í draumi er merki um að dreymandinn sé undir miklu álagi og setji sér markmið sem hann á erfitt með að ná. Eins gæti þetta verið merki um skort á sjálfstrausi sem hindrar dreymandann í að ná markmiðum sínum.

 

Og þá vitum við það - ég er undir miklu álagi og skortir sjálfstraust etc. hehehe  Verð greinilega að fara að vinna í mínum málum!

Já já, soldill munur...

...á hvernig er tekið á svona málum á Íslandi eða í Bandaríkjunum.  Mér finnst persónulega og prívat að við ættum að hafa Bandaríkjamenn sem fyrirmynd í þyngd dóma.  Það er hreinlega fáránlegt hvað menn (veit ekki um að konur hafi fengið dóm hér á landi fyrir kynferðisafbrot) fá stutta og litla dóma, og sitja u.þ.b. helminginn af sér, eru svo komnir út aftur til að brjóta af sér.  Hreint út sagt ÓTRÚLEGT - en svona er Ísland í dag!

800 ára fangelsi fyrir kynferðislegar misþyrmingar á þrem börnum

Mikið að gerast...

...úff, það er ekki laust við mikið bloggleysi á þessum bæ, en það er hreinlega bara búið að vera mikið að gera á bænum undanfarið.  Engar stórfréttir samt í gangi, nema þá helst að eldri prinsessan varð 5 ára síðastliðinn föstudag og hélt upp á stórafmælið með pompi og prakt.  16 vinir og vinkonur mættu á svæðið og samfögnuðu henni seinnipartinn og svo eftir að þeirri gleði lauk kom fullorðna frændfólkið í kaffi, svo að það var mikið að gera á bænum í síðustu viku.  Stórbakstur og tilheyrandi

Það var mikil gleði hjá prinsessunni að verða loksin 5 ára, enda búin að bíða eftir því síðan í september að eiga afmæli.  Annað eins gjafaflóð hefur líka aldrei sést á þessu heimili og daman mun ríkari en áður af hinum ýmsu munum sem að eru nauðsynlegir fyrir 5 ára prinsessur.  Litla systir var smá græneygð að horfa uppá allar þessar gjafir, en hún var hæstánægð með að fá nokkrar gjafir líka, enda ekki alveg að skilja þetta ennþá - en er þó komin með það á hreint að hún á afmæli í maí.

Höfum undanfarinn mánuð verið að leita okkur að hentugum húsgögnum í stofuna, en höfum ekki fundið neitt sem að okkur líkar við, svo að leitin heldur áfram, erum búin að þræða held ég hverja einustu húsgagnaverslun á stórhöfuðborgarsvæðinu og mér finnst alveg merkilegt hvað í raun er lítið úrval, flestar þessar verslanir eru með mjög svipuð húsgögn, og þá bara kannski 1-2 hluti í sömu línu, en við viljum náttúrulega fá heildarlausnina uppá lúkkið að gera, ekki samansafn af ýmsu.  Kannski erum við bara svona erfið, en blessunarlega erum við með sama smekkin og vitum uppá hár hvað við viljum, eigum bara eftir að finna það hehe...  Það er svo sem ekkert mál, fermum ekki fyrr en eftir 9 ár

Vorum samt að velta fyrir okkur um helgina hvað hefði orðið um allan þennan tíma, okkur finnast ekki vera komin 5 ár síðan að Elíza var lítil, enda er hún ennþá stóra litla barnið okkar, sem reyndar er byrjuð að læra að lesa, svo að það eru kannski liðin 5 ár, en vá, tíminn líður ótrúlega hratt!

Maður verður greinilega að fara að koma því í verk sem að maður ætlar sér, áður en maður verður of  gamall til að standa í svoleiðis stússi, eftirlaunaaldurinn færist óðum nær!

Töfralausnir

Eftir að hafa heyrt og lesið þessa frétt er ég alveg agalega fegin að hafa aldrei haft trú á þessum töfralausnum og hvað þá látist ginnast útí einhverja svona vitleysu.  Ég hafði það einu sinni af að fara á kynningu og þá fengum við að smakka ógeðslegan hristing - læknaði mig alveg af þeirri bakteríu að fara á einhvern sjeik kúr.  Held því semsagt enn fram að "töfralausnir" virka ekki!!  Allavegna ekki ef maður er að leita eftir langtímaárangri, og hvað kemur fólki og sérstaklega ókunnugu fólki það við þó að maður sé með smá spek? 

Sex lifrarbólgutilfelli eftir neyslu á Herbalife

Árið

Gleðilegt ár allir saman og takk fyrir það gamla.  Bara svona að láta vita að maður er ennþá á lífi, en eitthvað ryðgaður og andlaus eftir allt átið undanfarna daga.  Mest lítið að frétta, en það breytist væntanlega þegar líður á mánuðinn og maður byrjar að plana nýja árið betur.  Þegar nokkrir hlutir komnir á skedjúlið svo að það ætti að vera hægt að segja frá einhverju skemmtilegu þegar líða tekur á mánuðinn.